Yfir 50 þús. tonn af sjávarafla á land í Hafnarfirði

Nær 51 þúsund tonnum af sjávarafla var landað í Hafnarfjarðarhöfn á sl. ári sem mesti afli sem hefur komið á land hér í Firðinum um langt árabil.  Liðlega helmingur aflans eða um 26.300 tonn var landað af erlendum frystiskipum en afli íslenska togara og báta var um 24.500 tonn.

Stærsti hluti innlends afla var ísfiskur eða um 14.000 tonn, um 9.500 tonn frá íslenskum frystitogurum og nær 1000 tonn frá minni bátum og strandveiðum.

Skipaumferð í höfninni var einnig með allra mesta móti á sl. ári.  Alls komu um 550 stærri skip til hafnar í Hafnarfirði og Straumsvík.  Skipaumferð stærri skipa hefur aukist frá um 400 skipum á ári að jafnaði fyrir 5 árum í 550 eða um liðlega þriðjung.  Mest munar þar um fjölgun bæði innlendra og erlendra togveiðiskipa og einnig hefur orðið fjölgun í komum farmskipa og ýmiss konar þjónustuskipa.

Heildarvöruflutningar til Hafnarfjarðarhafnar voru liðlega 1 milljón tonna sem er sambærilegt og verið síðustu ár, en vöruflutningar hafa aukist til hafnarinnar á síðustu 10 árum um nær 150 þús tonn á ári, eða nær 20%.

Stærsti hluti vöruflutninga fer um Straumsvíkurhöfn eða um 755 þúsund tonn en heildarflutningar í Hafnarfirði voru rúmlega 250 þús. tonn.  Mest var flutt inn af jarðefnum fyrir malbiks- og steypustöðvar eða nær 84 þús. tonn, liðlega 60 þús. tonn af salti komu til Hafnarfjarðar og tæplega 30 þús. tonn af olíu og asfalti.  Þá voru einnig flutt inn ríflega 25 þús tonn af sementi  og skipað út nær 33 þúsund tonnum af brotajárni.

Sjá nánar yfirlit um skipakomur og vörumagn árið 2025.