Framkvæmdir ganga vel við Háabakka
Stefnt er að því að skip Hafrannsóknarstofnunar geti lagst að nýjum Háabakka framan við Fornubúðir í nóvember nk. Framkvæmdir hafa gengið vel í sumar, en nokkur tími hefur farið í að fá fram fullt sig við nýja hafnarbakkann.
Byrjað er að steypa bryggjukantinn að norðanverðu og næstu verkefni er að ganga frá lögnum á bakkasvæðinu fyrir rafmagn, heitt og kalt vatn og ljósleiðartengingu. Því næst verður farið í að steypa og ganga frá þekjunni og gera viðlegu við þilið fullklárt.
Þessa dagana er verið að dýpka framan við þilið þar sem dýpið verður 8 metrar og einnig er dýpkað þar sem innsigling verður að hafnarbakkanum. Reist verður tæknihús við sunnanverðan bakkann og síðasti áfrangi verksins er smíði á trébryggju milli Óseyrarbryggju og Háabakka. Stefnt er að því að þessum framkvæmdum verði öllum lokið vorið 2020.