Í þjónustu hafnar í 50 ár

Lóðsbáturinn Þróttur hefur nú verið í þjónustu Hafnafjarðarhafnar í samtals 50 ár, eða frá árinu 1969.

Báturinn var smíðaður í Kópavogi árið 1963, sem fiskibátur og er því kominn vel á sextugsaldurinn.  Þróttur er 13.54 m að lengd og 4 m breiður með Catipillar 360 hp vél og togkraft uppá 3,8 tonn.

Töluverðar endurbætur og breytingar hafa verið gerðar á Þrótti á þessum tíma sem hann hefur verið að þjóna höfninni, lengi vel sem eini bátur hafnarinnar.  

Árið 1973 var framþilfarið sléttað á Þrótti og settir fenderar á stefni og bóga, dráttarkrókur og steypt kjölfesta.  Ný aðalvél var sett í bátinn árið 1974 og nýtt stýrhús með tækjum og búnaði árið 1985.  Aðalvél var tekin upp árið 1991 og nú á 50 ára þjónustuafmælinu fær Þróttur allsherjarupptekt.   Aðalvél verður tekin upp og yfirfarin, skrokkur sandblásinn, málað og endurbætt þannig að báturinn komist í besta stand og geti nýst höfninni sem lipur og góður lóðsbáttur og „púllari“ um einhver ókomin ár.